السبت. ديسمبر 5th, 2020

بوابة شموس نيوز

إلكترونية – يومية – مصرية

إفرحوا .. يا نصابين !!

1 min read

بقلم داليا جمال – شموس نيوز

لو عندك قصر منيف في أرقي المناطق، أو قطعة أرض ثمينه تساوي عشرات الملايين . عمارات شقق محلات ، إوعي لنفسك، علشان هتتاخد منك في لمح البصر .. بعد القانون الجديد للبرلمان المصري الذي أتاح نقل الملكيه للعقارات بناء علي حكم قضائي بالبيع!!
يعني أي نصاب أو مزور يقدر يضرب عقد بيع لأي عقار يعجبه .. ويرفع قضية إثبات ملكيه بالمحكمه ( والقانون الجديد لايشترط حضور البائع بنفسه ) ويطلع الحكم .. ياخده النصاب ويجري علي الشهر العقاري ويسجل العقار بأسمه ..لأن القانون الجديد ألزم الشهر العقاري بإشهار التسجيل بموجب حكم المحكمه !!! ويمسك المزور عقد ملكيه مسجل من الشهر العقاري يرخص به مباني ويدخل مرافق ومافيش ( تخين) يقدر ينازعه ولا حتي صاحب العقار .. اللي يا عيني عليه .. لا باع ولا اشتري! وكلنا نعرف مدي سهولة الاحكام الغيابيه . والمحكوم عليهم مش داريين بحاجه . وقد وضع القانون الجديد ضمانه ( واهيه ) وهي أن ينشر النصاب إياه إعلان بالحكم القضائي باحدي الصحف !! يعني لو مالمحتش الاعلان المعين ده في جريده معينه بتاريخ معين ( بالسلامه ) .. مالكش حجه .. بيتك اتخرب وملكك ضاع .
لاشك أن هذا القانون سيفتح الباب علي مصراعيه لنهب وسرقة الأملاك العقاريه بمنتهي السهوله . حتي أن الدكتور علي عبد العال رئيس البرلمان أعلن بنفسه عن تخوفه من أن يكون هذا القانون وسيله لانتزاع الملكيه من اصحابها !!
القانون الجديد ظاهره تسهيل إجراءات التسجيل المعقده بمكاتب الشهر العقاري من بحث تسلسل ملكيه، وإجراءات المساحه، ومعاينات . وهي أضمن مليون مرة . من مجرد حكم محكمه يصدر غيابيا فيصبح العقار مسجلا بإسم محامي ( شمال ) أو محترف تزوير .. ونلاقي أولاد الذوات .. وأصحاب الأملاك في الشارع بجلاليب مقطعه وشعر منكوش .. ماشيين يكلموا نفسهم .. وبيقولوا : لا بعنا .. ولا اشترينا . ولا حتي الإعلان قرينا !