الثلاثاء. أكتوبر 27th, 2020

بوابة شموس نيوز

إلكترونية – يومية – مصرية

الطالب الوافد .. سره باتع !

1 min read

بقلم داليا جمال – شموس نيوز

الطالب الوافد لمن لا يعلم .. هو الطالب الذي يحمل جنسيه غير مصرية ممكن يكون عربي أو أفريقي أو أي جنسية اخري وحاصل علي شهادة الثانوية من بلده .. وييجي يدخل عندنا في مصر اكبر جامعه و ( أتخن ) كلية من كليات القمة زي الطب والصيدلة والهندسة ..

ناس هتقول وماله مايدخلوا .. دي حاجه تكبر مصر منارة العلم والعلوم .. ولكن هاتستغرب لما تعرف إن الوافدين بيدخلوا كليات القمه عندنا بمجموع ٧٠ % و ٦٠ % ويمكن اقل!
في الوقت اللي طالب مصري مجموعه اكثر من ٩٧% يتحرم من دراسة يتمناها ويستحقها
وقد استفحل الأمر لدرجة أن أعداد الطلاب الوافدين بدأ يرتفع ويزيد عن أعداد الطلاب المصريين داخل كليات الطب بالجامعات الحكومية بل والخاصه أيضا .
وبذلك يقل عدد الاطباء في بلدنا التي تعاني أصلا من نقص شديد في الاطباء . وإن كانت وزارة التعليم العالي تباهي بزيادة أعداد الطلاب المقبولين بالقطاع الطبي هذا العام . فهي صورة خادعة لأن نصف الأعداد تقريبا ( وافدين)، وهيسافروا بلادهم بمجرد تخرجهم بغير رجعة .
ترى ما السبب الذي يجبرنا أن نقبل بهذا الوضع؟ هل لأن مصروفات دراسة الوافدين ضعف مصروفات الطالب المصري ؟ أو هل وزارة التعليم العالي تقوم بعمل انساني لبعض الجنسيات العربيه ؟ بالطبع لأ .. لأن الطلبة الوافدين من جميع جنسيات العالم !! هل كام الف جنيه زيادة في المصروفات تساوي تحطيم حلم واحد من أولادنا لم يجد مكانا بكلية طب لأن هناك طالب من جنسية أجنبية جايب ٥٠ % وقاعد مكانه .

اعتقد ان كل الحجج للابقاء علي هذا الوضع باطلة .. لو علي الفلوس .. فيه في بلدنا ناس بتدفع بالمائة والمئتين الف في العام الواحد لتعليم ابنهم .. ولو علي العملة الصعبة مش الكام الف دولار بتوع الوافدين هما اللي هيملوا خزينة الدولة بالعملة الصعبة . لأن دكتور مصري واحد ناجح في الخليج يحول أدهم عشرين مرة ..
جايز فيه سر باتع ماحدش عارفه .. أو أعمال سحر وشعوذة بيعملوها الوافدين علشان ياخدوا اكثر من نصف الأماكن بكليات الطب .. والهندسة .. والكلام ده ماينفعش يا مدرسة .