السبت. سبتمبر 21st, 2019

بوابة شموس نيوز

إلكترونية – يومية – مصرية

الفاشل يبطل يعلق فشله على السوريين والحاقد.. يروح يعالج نفسه.. هو بقي

1 min read

كتبت: داليا جمال – شموس نيوز

الست دي بطريقة عفوية جدا قالت الجملة دي ( ده بيكسب مليون جنية في اليوم) لكن فعليا اظهرت كم الحقد والغل اللي جواها اللي اثبت ان كان هدفها الاساسي بس انهم يقفلوا محل الشاب السوري عشان مرضيش يشتري شقتها ب3مليون جنية وهي اساسا كانت شارياها ب100 الف من 12سنة باعتراف بنتها مع ان لو المحل ده كان تبع اي ظابط او قاضي او اي راجل اعمال له علاقاته في المجلس المحلي والبلدية ومجلس المدينة كان خلاها تضرب دماغها في الحيطة هي وعيالها وكانت باعت الشقة او اجرتها وعزلوا في اي مكان تاني لكن الطمع والوساخة والعنصرية بتطفح لما بيبقي الخصم ضعيف ويا حبذا لو واحد مغترب عامل مشروع فيه 150 عامل بياكلوا عيش وبيدفع ضرايب ومخدش مليم من حد بالعكس ده بيدفع ضرايب وخدمات وبيساهم براس ماله البسيط في خلق فرص عمل لمئات الشباب الاسكندراني اللي الدولة موفرتلوش فرص عمل..

احنا لو ماشيين بمبدأ ان دول ناس جايين ياخدوا رزقنا يبقي حلال اللي بيتعمل فينا في الخليج عشان حكوماتهم خدت قرارات بتوطين اغلب الوظايف لولاد بلدهم مع ان فيه ملايين المصريين المغتربين بيشتغلوا هناك وبيطفحوا الدم عشان يعرفوا يعيشوا ويحوشوا قرشين بالكاد ..ليه معظمنا بقي بيكره الخير للناس وبيتمني زوال النعمة عن غيره ويبقي زي الارانب البيضا قدام اي حد قوي بيعرف ياخد حقه كويس…ليه يوصل الموضوع اننا نسب كل السوريين في مصر ونطالبهم بالسفر لبلدهم قال ايه عشان ناخد حق الست العجوزة مع اننا، لما بيحصل اي تجاوز في حق اي مغترب مصري في اي دولة بنبقي عايزين ناخد حقه وبنحزن لو ده محصلش ونقوم الدنيا .. ليه بلاعة العنصرية وعدم تقبل الاخر اتفتحت دلوقت والاعلام بتاعنا بيدعمها ويغذيها…الارض ارض الله والرزق حتما مقسوم لا هيزيد ولا هينقص بسبب حد .. عايزين نبقي اسوياء ده ربنا بيقيم الدولة العادلة ولو كانت، كافرة ولا يقيم الدولة المسلمة لو كانت ظالمة. . 
#السوريين_منورين_مصر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *