السبت. سبتمبر 21st, 2019

بوابة شموس نيوز

إلكترونية – يومية – مصرية

شرفتي مصر بحالها يا دكتوره ميرنا #

1 min read

بقلم داليا جمال – شموس نيوز

ميرنا فخر لكل المصريين

ميرنا حسني فخري .. بنت من شبرا كنيسة مارجرجس بخمارويه
الحكاية ببساطه
ميرنا طالبة بكلية الصيدلة الجامعه البريطانية
اشتركت في مسابقة معمولة في جامعتها عن clinical skills
وده عبارة عن قسم بيركز على المريض اكتر وعلاقته بالادوية
وبيكون فيه شوية حاجات دراسية من طب اكتر من صيدلة .. 
يعني ممكن نقول ميكس مابين طب وصيدلة

المهم ميرنا دخلت مسابقة على مستوى جامعتها عبارة عن تشخيص حالة مرضية بالكامل وكتابة تقرير عنها يشمل الادوية المطلوبة لعلاج الحالة بعيدا عن اي اثار جانبية
وخدت المركز الاول على الجامعة البريطانية ..
فقررت تشارك في مسابقة عالمية بتتعمل كل سنة من دولة مختلفة لكن بشكل اكبر وموسع
والمرادي كانت المسابقة في رواندا بافريقيا
وكان مشترك في المسابقة 45 دولة
ميرنا كانت داخله المسابقة بتمثل جامعتها
لحد ماجالها تليفون قبل ميعاد السفر بيومين ان الدولة رشحتها نظرا لتفوقها انها تمثل مصر في المسابقة دي

وبالفعل سافرت ميرنا .. لكن كانت الصدمة كبيرة بالنسبالها
لما لقت في شروط المسابقة ان لازم اللي يشترك من كل دولة فريق مكون من خمس افراد بيمثلوا دولتهم
وهي للاسف كانت لوحدها
وبالفعل بدأ الاختبار .. وقدموا لكل الفرق المشاركه حالة مرضية مريضة بالقلب وشوية امراض تانيه .. بحيث الطلبه يشخصوها ويشوفوا انسب ادوية ليها ولظروفها الصحية
وايه اللي الحالة متاحه تاكله او تشربه وايه لأ .. وايه الادوية الفعالة ليها وايه لا

وكل ده ميرنا ماستلمتش ورق الاختبار نظرا لانها لوحدها
فبدأت تتكلم مع مسؤلة المسابقة البرتغالية وهي زعلانه وبتعيط انها جاية من مصر لوحدها علشان تمثل بلدها ومش عاوزة ترجع مكسورة بسبب شرط ملهاش ذنب فيه

وبعد اجتماع اللجنه .. قررت تضع بند استثنائي عن امكانية قبول فرد واحد يمثل دولته
وسلموها ورق الحالة 
لكن للاسف كان باقي 6 ساعات فقط على انتهاء المسابقة وتسليم التقارير
يعني كل المجموعات من ال 45 دولة مستلميين الحالة من 18 ساعه .. بالاضافة ان كل مجموعة مكونة من خمس افراد ، اما ميرنا كانت لوحدها واستلمتها قبل انتهاء المسابقة ب 6 ساعات فقط

وقبل اعلان النتيجة .. كانت فرحانه انها عملت حاجه بتحبها حتى لو مخدتش مركز .. المهم انها شاركت واثبتت نفسها

الى ان تم اعلان النتيجة على الملأ امام كل الحاضرين من كل دول العالم ..

الفائز الأول على مستوى العالم في مسابقة clinical skills 
دكتورة ميرنا حسني من مصر … مارجرجس خماروية شبرا مصر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *