الجمعة. يوليو 10th, 2020

بوابة شموس نيوز

إلكترونية – يومية – مصرية

مش محتاج دراسة !!

1 min read

بقلم داليا جمال – شموس نيوز

أعلنت الحكومه أنها تدرس تحديد مواعيد الغلق للمحلات والمقاهي والورش بعد انتهاء ازمة كورونا، يا دين النبي…. هو ده قرار محتاج دراسه !!
ده قرار لازم يتنفذ فورا وإلي الأبد .. ودي هتكون أكبر فايده عادت علينا من أزمة كورونا .
ندرس إيه وكل دول العالم المتقدمه والمحترمه تغلق كل أنشطتها الاقتصاديه الساعه السابعه او الثامنه مساء .
ويكفينا توفير الكهرباء التي تهدرها المحلات، و توفير بنزين و سولار العربيات اللي دايره في الشوارع لحد الصبح .
و بالمره.. نرحم نفسنامن التلوث والضوضاء اللي قربت تجنن الناس، فاصبحت سلوكياتهم عدوانيه.
وادينا جربنا وقت الحظر ازاي الشوارع بتكون هاديه واكثر أمانا .. وياريت نسأل نفسنا هو مين فينا بيعرف يركن عربيته تحت بيته بسبب محل فاتح لحد نص الليل؟ ومين فينا لم يفاجأ بكوفي شوب فتح جنب بيته وسود عيشته من الضجه ودخان الشيشه والمتسكعين حول الكافيه لوش الصبح.. تقولش ملهي ليلي !

وياسلام بقي لو فاتح تحت بيتك ميكانيكي ولا كهربائي سيارات .. في الحاله دي لو انت ساكن في الدور العاشر مستحيل هتنام من أصوات الدق ولا الشتائم والالفاظ النابية بين الصنايعية .. ده غير الفوضي في الشارع بسبب العربيات اللي بتتصلح .. واللي يسألني ( بيحصل فين ده ؟)
أقوله… انظر حولك في كل حته في الأحياء الشعبيه، و موجود في المهندسين والزمالك وجاردن سيتي، مليانين كافيهات وورش ومحلات لا تغلق أبوابها قبل ساعات الصباح الأولي، ده إن قفلت ! وأحب أطمن أصحاب المحلات والورش والكافيهات أنه لن ينقص من رزقهم شئ ..ولكن بدل مابيسهر للصبح ويفتح المحل علي الضهر . هيقفل بدري ويفتح بدري .. والرزق هو هو. أظن.. الموضوع محسوم وأي مواطن مصري يتمناه .. إلا إذا كان مواطن من سكان الكومباوندات .. وليس له علاقه باللي بيحصل في البلد . ويا خوفي ليكون صاحب الدراسة منهم!
الساده أصحاب المسؤلية… هذه الفرصة لن تتكرر كفايه دراسة .. واطلعوا بالقرار .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *