الأثنين. مارس 1st, 2021

بوابة شموس نيوز

إلكترونية – يومية – مصرية

إهتزت الصورة …. وطلعوا مقلب !

1 min read

بقلم داليا جمال – شموس نيوز

نمنا في أمان الله واستيقظنا علي أحداث لا يصدقها عقل . هجوم متظاهرين علي الكونجرس الامريكي وإقتحامه بتقولوا إيه يا ولاد ؟
الخبر صحيح.. وموجود في كل قنوات الأخبار العالميه !! الصور والفيديوهات بتقول كده واحنا مش مصدقين عنينا . والمعروف عن الشعب الأمريكي أنه شعب لا يتحدث في السياسه أبدا وأنها ليست من اهتماماته مهما كان مستواه التعليمي او الاجتماعي ، وآخره في السياسه التصويت في الإنتخابات فقط . هو صحيح ممكن يكسر الدنيا ويتظاهر عند الإعتداء علي مواطن أسود أو لأي تجاوز قانوني في حق المواطن الأمريكي .. لكن للسياسه لأ .. ويا أخي مناظر المتظاهرين ماتقولش ناس بتفهم في السياسه أبدا إنما كانت مناظر زي ما تكون من حواري شيكاغو أو مشردين من أحياء نيويورك الفقيرة من مدمني الخمر والمخدرات .. مناظر لبشر لا يمكن أن يهتموا او يعملوا مظاهرات سياسيه !! بالذات الأخ اللي كان لابس هولاكو ومركب قرون .. وكله كوم والناس اللي كانت بتمشي علي الحيط كوم تاني !
ولا الأخ اللي كان بيسرق منصة الكونجرس !!
أكيد هيبيعها في سوق ( الفرايداي) بتاع امريكا . واللي جايين يتظاهرو علي خيل وحمير .. المظاهرات إستمرت كام ساعه لكن شوفنا العجب . لدرجة شماتة أبله ( ظاظا ) هي وكل دول العالم في ماما أمريكا اللي عماله تعلمهم الأدب وإزاي يتعاملوا مع المتظاهرين !! الحقيقه إن شكل امريكا إهتز في عيوني وعيون العالم وعيون سكان الخصوص ومنيل شيحه ومنشية ناصر ، من هنا ورايح ماحدش يعلي علي حد ، ولا دوله تنظر علي التانيه ، بعد ما تساوت الرؤوس .
امريكا بجلالة قدرها طلعت زيها زي بلاد الواق واق ، وأسوأ من جمهوريات الموز .. اموت واعرف كانوا مخبيين المناظر دي فين؟ ولا ترامب جابهم منين ؟ و ياتري هنشوفه في حفل تنصيب بايدن الأسبوع القادم ولا هيعمل زي ما عمل مع المتظاهرين وقالهم إطلعوا علي الكونجرس و ( إنتظروني انا مش جاي ) ؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *