بوابة شموس نيوز

إلكترونية – يومية – مصرية


Warning: sprintf(): Too few arguments in /home/shomos/public_html/wp-content/themes/newsphere/lib/breadcrumb-trail/inc/breadcrumbs.php on line 254

الباب الموارب

1 min read

بقلم دكتورة مها العطار: مطور طاقة المكان

أول ما ترقيت وبقيت مدير كان من ضمن الفريق بتاعى ولد شاطر جداً وناجح وبيجيب التارجت بتاعه وكله تمام بس كان لعبى شويتين. يعنى بيزوغ كتير وبياخد أجازات كتيره، وفى مره طلب منى أجازه علشان يسافر مع أصحابه وانا مرضيتش فطلبها مرضى وكلمنى وقالى إنه تعبان ومش قادر ينزل.
قمت انا عملت ايه؟
رحت عند بيته من بدرى، مانا عارف بقى كل التفاصيل وعارف إنه مسافر اليوم ده واستنيته وهو نازل ومسكته تحت بيتهم وعلّمت عليه، اللى هو أدينى عرفت إنك كداب واليوم ده مخصوم بيومين علشان تبقى تشتغلنى كويس مع نظرتين من فوق لتحت كده وخليت الولد ياعينى واقف زى اللمونه..
تفتكروا ايه الى حصل؟
الولد قدم استقالته، وخسرت انا ٥٠٪ من أرقامى اللى كنت بحققها عن طريقه.
غباء منقطع النظير منى، إيه اللى انا عملته ده وليه واستفدت ايه؟
اكتشفت وقتها إن كل حاجه فى حياتى خسرتها كانت بسبب أنى بزنق اللى قدامى لدرجه انه مابيلاقيش مفر فبيهرب …
موضوع إنك تزنق حد أوى كده ملهاش غير ردتين فعل، إما يهرب وإما يهبشك علشان يدافع عن نفسه. فى الحالتين إنت خسران خسران.
علشان كده دايماً ساعه المواجهه، لازم التراجع يتم فى اللحظه الصح، علشان لو معملتش الحركه ديه يبقى خلاص كش ملك.
مافيش أى انتصار فى إنك تكسب نقاش أو توصل للى قدامك إنك كشفته، لأنك فى الحقيقه بتعريه قدام نفسه وقدامك، ومافيش إنسان سوى هايستحمل التعريه، كلنا بلا إستثناء بنتجمل قصاد بعض، وده مش عيب، مدام ربنا ساترك تفضح نفسك ليه؟ التجمل اللى بنعمله ده منحبش حد يكشفه، وكمان بقسوه متناهيه كده، التجمل ده هو ورقه التوت الى بتسترنا وتحمينا.
خلى دايماً للى قدامك سكه يرجع منها، فهمه إنك فاهم بس مش أوى وسيبله حته يستر بيها نفسه ويفضل على الشكل المتجمل بتاعه.
مش لازم فى النقاش تثبت إنك صح لإنك مش هاتفوز بجائزه، مش لازم فى الخلاف تجرح وتدبح علشان تنتقم لنفسك، بلاش فى النهايات تحرق مراكبك.
“سيبوا الباب دايما موارب” يمكن ترجعوا …
وسيبوا للى قدامكم منفذ يقدر يحمى بيه نفسه ويستر نفسه علشان لما يرجع…
فى النهايه بلاش تضييق الحصار لأنه مش انتصار…
الانتصار الحقيقى إنك تُبقى على إنسان
وعلى ستر إنسان…
منقول عن الصديق العزيز عادل عبد العزيز
دكتورة #مهاالعطار
مطور #طاقةالمكان

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *