بوابة شموس نيوز

إلكترونية – يومية – مصرية


Warning: sprintf(): Too few arguments in /home/shomos/public_html/wp-content/themes/newsphere/lib/breadcrumb-trail/inc/breadcrumbs.php on line 254

الذي.. خرج ولم يعد !

1 min read

بقلم داليا جمال

من غير حيره وتفكير كتير .. مين اللي بقي وجوده زي عدمه ؟ وفي ثواني مش بتلاقيه ؟ وماتعرفش بيروح فين ؟ وساعات بيطير ؟
أكيد المرحوم …!! هو في مرحوم غير الجنيه الذي فقد هيبته .. وبقي زي الفتوه الذي ضاعت صحته وتطاول عليه الحرافيش في روايات نجيب محفوظ ، لا بقي يقدر يشتري ساندوتش ولا حتي بيضه ولا واحده تين شوكي !
ولو صادف ومعاك جنيه غالبا هتنكسف تديه لشحات , وهتخاف تديه لسايس ليرميه في وشك .. بالذات لو فضه لأنك ممكن تتعور !! وتخجل تسيبه بقشيش لعامل في محطة بنزين .
والمكان الوحيد اللي لسه عامل اعتبار للجنيه وكمان للنص جنيه .. هي المواصلات العامه والميكروباص ، وده لأنك هتشوفه وتسمع عنه في صورة خناقات بين الركاب والسواق عن اللي باقي له جنيه . واللي له جنيه ونص .. وطبعا مافيش فكه ولكن كل واحد راكب دماغه ومش عاوز يسيب حقه في الجنيه اللي مالوش لازمه .
فاكرين ( الباكو) الألف جنيه بلغة جيل السبعينات اللي كان عباره عن مائة ورقه من فئة العشرة جنيه . كان الباكو عربون شقه في أفخم حي ، وممكن تدفع باكوين مهر عروسه بنت ناس .. وكنا ننبهر بالشنطه السامسونيت في الافلام العربي .. اللي مليانه بواكي مستفه .. وكانت رمزا لرجال الاعمال الكبار او تجار المخدرات ! وكنا ننظر بدهشه للثراء وكثرة الفلوس .
وعلما پان اللي في الشنطه خمسين او ستين الف جنيه بالكتير ! ولكن قيمتهم الفعليه وقتها اكتر من المليون حاليا .
وبمناسبة ذكر المليون جنيه او الأرنب بالعاميه ، فلقد أهين وفقد قيمته .. ده انت ماتعرفش تشتري بيه دلوقت شقه اوضتين وصاله في حي نصف شعبي ولا تهوب بيه ناحيه المدن الجديده . لف وارجع تاني .. ولا يشتري حتي عرببه كوري بعد اضافة الاوفر برايس لانها بقت بمليون ومائتين !!
اما احدث صيحه بقي في عالم قلة القيمه للجنيه المصري .. فهي فيلا الساحل الشمالي التي تخطي ثمنها حاجز ال ١٠٠ مليون جنيه . بصراحه لم اكن اتخيل اني ممكن اشوف حد بيشتري حاجه واحده بمائة مليون او اكثر .. انا كنت اتخيل ان الرقم ده يشتري مصنع .. او كمباوند بحاله فيه تلاتين فيلا .. انما فيلا واحده ! واحده ! .
والله ربنا يسترها ومانوصلش للمليار جنيه .. ونلاقي اللي بيقول الحقوا العربيه بقت بمليار جنيه والشقه بخمسه مليار .
لانه اكيد هنكون لسه بنقبض بالجنيه وبنعمل ١٠٠ اعتبار للالف جنيه ! الباكو بتاع زمان أيام الجنيه ما كان جنيه !!