الأحد. يوليو 25th, 2021

بوابة شموس نيوز

إلكترونية – يومية – مصرية

الضرائب لا تعرف .. يوناني !

1 min read

بقلم داليا جمال

“يوناني” لمن لا يعرفه هو شخصيه شديدة الغرابه . رجل لم يكمل تعليمه . وربما لم يتعلم أصلا، لسانه حلو بينقط سكر،. قادر ياكلك بكلمتين ، أو بالبلدي يلفك علي صوباع إيده الصغير في دقيقتين ويربط دماغ أجدع زبون،سواء كان بيه او باشا ، مهندس أو دكتور ، أيا كان منصبه !
،مقره دكان متر في مترين مجرد واجهه لنشاطه الفعلي ، كأشهر سمسار للشقق والعقارات والفيلات الفاخره، في مصر الجديده وضواحيها ، زبائنه من المشاهير وأصحاب السعاده والنفوذ ، اللي أي حد فيهم لابد يحتاج في يوم من الأيام لخدماته في بيع أو شراء عقار، شقه ، مزرعه ، ومافيش حاجه تستعصي علي يوناني وقدراته الخارقه في البيع والشراء !
بلا فخر ..هو رجل قادر فعليا أن يبيع لك التراب ويعمل له ثمن ! ونظرا لما حققه من نجاح في مهنة السمسره ، تحول يوناني من مجرد سمسار عقارات إلي نجم مطلوب بالإسم ، يحدد للزبون مبلغ سمسرة خيالي كشرط لإتمام أي بيعه ،ومالوش دعوه بنسب العموله المعروفه . عملا بمبدأه القائل؛ ضربة مرزبه ولا ١٠٠ خبطة شاكوش، واللي مايعجبوش . مايلزموش!!
وبيعه ورا التانيه..وزبون ورا زبون تحول السمسار الي رجل اعمال وشريك في عمارات فاخره في مصر الجديده وضواحيها . نمسك الخشب . يكسب ملايين بشطارته ( وماله ) لكن كل ده ومصلحة الضرائب ووزارة الماليه لا تعرف عنه حاجه ولا واخده بالها من يوناني وأمثاله !! وكل تركيزها مع الموظفين، والدكاتره ، فقط انما يوناني وأقرانه مكاسبهم حلال عليهم ، وحرام علي مصلحة الضرائب !!
لا حد بيسألهم ولا يحاسبهم ولا فيه فواتير بيقدمها بائع ولا مشتري تثبت أموال السمسره اللي اخدها في جيبه بالهنا والشفا !!
ياتري .. معالي وزير الماليه ورئيس مصلحة الضرائب يعرفوا ان يوناني وأمثاله زي المنشار .. طالعين واكلين ..نازلين واكلين . وضرايب مش دافعين!!
ولا هتفضل حقوق الدوله حلال علي يوناني ..وحرام علي مصلحة الضرائب ؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *