الأحد. يوليو 25th, 2021

بوابة شموس نيوز

إلكترونية – يومية – مصرية

النوبة التهميش الازلي

1 min read

المؤرخ النوبى يحىي صابر

بقلم المؤرخ النوبى يحيي صابر

(صفحة من كتابي النوبة الغريقة حياة الامان المطلق )
وزي ما قلت لكم قبل كده حتي السكة الحديد كان نهايتها الشلال وكأن بلاد النوبة موش تبع مصر ..انا سمعت ان الانجليز هما اللي عملوا كده (كان هذا كلام صابر) ..

ممكن وموش بعيد عشان يزرعوا الكراهية بين ابناء البلد الواحد ..بس كان لازم الحكومة تاخد موقف قوي وحازم طالما هما عارفين الانجليز وخباثتهم ..المفروض الحكومة كانت تصر علي مد السكة الحديد حتي حلفا ..

كانوا بيتحججوا ويقولوا طبيعة المنطقة لاتسمح بذلك ..يعني طبيعة البلاد كلها سمحت بس الحتة دي اللي استعصت عليهم ..ما السكة الحديد ماشي في غرب النيل لغاية نجع حمادي وبعد بيتجه للشرق لغاية الشلال ..

كان ممكن يتجه تاني ناحية الغرب من اسوان لحد حلفا ..حجج فارغة وكلام غير منطقي ..انتو تفتكروا انهم حيتوقفوا علي كده ..

يعني حيعملوا ايه تاني ..ممكن يعلو الخزان تاني وممكن يعملوا سد كبير يغرق بلاد النوبة بالكامل وانا سمعت ان في افكار متداولة في اروقة الحكومات عشان موضوع السد ما انتو عارفين ان البشوات هما اللي بيحكموا مصر وطبعا هما بيمتلكوا الاف الافدنة وموش عايزين اي تهديد ييجي من النيل ..

طيب ما ممكن في بدائل تانية بدل ما يغرقوا بلادنا ويشحططونا هنا وهناك ..في ايه لما يوصلوا المياه الزائدة الي الصحراء الغربية علي الاقل ممكن استصلاح اراضي واستزراعها يعني فايدة لمصر كلها ..طيب دي يتم ازاي ..بجموعة من الخزانات علي النيل ترفع الماء الي قنوات تتجه للغرب ..

واحنا عندنا في بلادنا في اماكن كتيرة غير مؤهولة ممكن ان تستغل ..طيب ما تبعت الافكار دي للحكومة يا عم حسين ..يعني هما ما يعرفوش يابني ..هما دايما بيتجهوا للحلول السهلة واللي حتفيدهم بس موش اللي حتفيد البلد بصفة عامة ..ربنا يستر وما يينفذوش موضوع السد ..

انا سمعت ان الملك فؤاد موش موافق علي فكرة السد وقال موش معقول نغرق بلاد النوبة بالكامل بما تحتويها من حضارة ضاربه في عمق التاريخ ...يحيي صابر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *