الأحد. يونيو 13th, 2021

بوابة شموس نيوز

إلكترونية – يومية – مصرية

عائشة قنديشة و سارة.

1 min read

الشاعرة جوليانا فالنتينا باناصا – المغرب – شموس نيوز

لقد إستيقظت و هي تنادي ،لقد أتت لهاته الليلة تطلب مني التسليم ،قالت لي :
تسليممممم امولين المكان.
جيتك قاصدة أحلامك ،قاصدة ريشة يديك و هادوك الألوان الزاهية من روحك الجاية بريحة الحنة و المسك و الجاوي .
سارة الكلام موجه ليك …
سارة ،يا إبنة سبوا و الترس و الحمري ،و طير ابقر ،لقد أتيتك الليلة تسلمي بإسمي. عيشة مولات الواد الساكنة في سبو ،اللي دات الأرواح ،كمال و حمو ،و صفية و ولد هموا ،عايشة مولات الحفرة ،إللي عمر شي حد ماشاف وجهي و لا حذق عيوني و لا عرف شحال من سمية عندي و لا شحال في عمري، و لا صغيرة و لا شارفة ،يجي الموت يخرج عمري
جيتك اليوم يا سارة نحكي و نطلب و نآمر يا بنت عمي
أنا جيتك يا سارة ،عيشة قنديشة مكحلة العيون العسليين من الواد و القصور و الشأن و المرشان ،من تحث الواد ،جيت بخدامي و حشمي ، نطلب منك أمنية ،من بنت الغرب الزوينة ،العاشقة لترابوا ،الساكنة في مكانوا ،جيت و جيت ببراكتي ،نطوف على سيدي الدرويش ،و ما نعطي البراني ،إلا ولد بلادي الغرباوي ،يستحق براكتي و باركت الواد ،و نعيط عليك بالعاني ،بغيتلك الستر و الصحة و الرضى ليك لا البراني
سارة جيتك في منامك ،نتكلم معاك بالغرباوية الحساني و من قبائل بني ببعابشة و بني مالك ،و سيدي حسن و شراردة ،و نزيدك ولدي مول الشأن ،لي سميتوا على سميت بلقصيري ولد الشأن مول القصرية إبن الجواد الحساني البعبوشي إبن القصيري ،لي قطع الواد و هو حامل ،و طلب الجواد بتهز شانوا ،و يتسمى البلاد على ألقابوا ،إبن قصيري .
جيتك اليوم يا سارة ،و جبتلكم حجاية و ألف حكاية ،جيتلك في صورة بهية زوينة ،سمرة الواد و العيون العسلية ،الزين البلدي الزين الحمري، بالشامة الترسيمة و الكحل المرسوم على العيون القتالية ،و الفم عنقود من الدالية اللي مسقية بما سبوا
،من واد سبوا ،جيتك بالألوان ،بالصفر و الحمر و الألوان اللي تتزهر في كل مكان ،أنا عائشة قنديشة لي ساكنة الواد ،مولات الحفرة ،بنت الجن و الشأن بنت هاد البلاد ترسميني و تعلي لي شاني في بلقصيري و على ربوع سبوا تنصريني يا سارة يا بنت البلاد .
تسليم تسليم

.ج ف ب