عقد المحبة (خواطر من غرفة الإنعاش)
بقلم الشاعرة الدكتورة نسرين الرفاعى
عُقد المحبة اتفرط من بعد ما سِبتنا
الصح تاه في الغلط ياريت ما عودتنا
***
باقة ورود كلنا كنت انت ربطتنا
بس الفراق هدِنا وفقدنا بهجتنا
***
فقدنا بوصلة أمان والتوهة بالكيلة
رُمانة الميزان للأهل و العيلة
***
في الشدة جَمَعتنا بالود و الحكايات
وقدرت توصل لنا وتقرب المسافات
**
إحساسك العالي يوصل لكل وحيد
تشده من أزمته يرجع لنا من جديد
**
معقولة زيك كدة طول عمره متغرب
وقت الألم وسطنا تواسي و تطبطب
**
أيوة افتكرتك أنا في أصعب الأزمات
لو كنت جيت شُفتني بين الحياة و الممات!
**
حاجات كتير كانت اكيد هتتغير
والحزن يبدأ كبير وينتهي صغير
**
بتحس حجم الخطر لو هدد الأحباب
تسمع لشكوتنا من غير ملام و عتاب
**
عشان عيادة مريض مش بس للواجب
قلق حقيقي رهيب ع الأهل والصاحب
**
حَسبت كل القلوب لازم تكون زينا
ساعة ما نحتاجها تجري تكون جنبنا
**
أتاريني ساذجة أوي دة احنا فصيل نادر
ماشيين ندلدق حنان كتير مالوش اخر
**
بتقول هيترد لي لما ارمي خير في البحر؟
ما وجدت في شدتي زيك سند ولا ظهر
**
من بعد فرقة أبي انت اخونا الكبير
حبك و حنيتك فرقت معانا كتير
**
أنا عندي من فضلك عتاب كبير عندك
فارقتنا في غفلة طب مين ينوب عنك؟!!
