الأربعاء. مايو 12th, 2021

بوابة شموس نيوز

إلكترونية – يومية – مصرية

كل سنه بقي وانت طيب !

1 min read

بقلم داليا جمال

اول ما يبدأ شهر رمضان الكريم يبقي يا ويلك ويا سواد ليلك ايها المواطن إذا كان لك طلب أو مصلحه محتاج تخلصها في إحدي الجهات الحكوميه ! ومقدما كده لازم تكون متأكد تماما أنها لن تنقضي ! وغالبا مش هتسمع غير جمله واحده مكرره في كل المصالح الحكوميه ” بعد العيد ” ، و مهما استجديت أو تعذرت بأعذار تبين مدي حاجتك القصوي لإنهاء مصلحتك ، فلن تقابل إلا بكل بلاده وتناحه ، و… يابيه كل سنه وانت طيب إحنا في صيام !!
لتجد نفسك في حاله من القهر والغيظ .. وممكن يشتعل فيك الحماس وتروح تشتكي للمدير أو لمدير المدير .. فتقابل بالرد الذي يضعك أمام حيطه سد .. يا بيه مدام فلانه غايبه من كام يوم .. وكل سنه وانت طيب .( وبالمناسبه لازم نفرق بين كل سنه وانت طيب بتاعة الموظفين .. وكل سنه وانت طيب بتاعة الشحاتين ) ودي لغه مايفهمهاش غير المواطن المدقرم .
ولم تقتصر حجة الصوم في رمضان وحلول الشهر الكريم علي موظفي الحكومه فقط ولكن ايضا علي اصحاب المهن والصنايعيه عندك كهربا بايظه في البيت ، او السباكه ضربت ، أو عربيتك عطلت وعاوزه عمرة ، هتلاقي برضه نفس الرد .. احنا “نلصمها” دلوقت .. ونصلحها بعد العيد !!
وكأن شهر رمضان جاء لتعطيل مصالح الناس والكسل وقلة العمل !
ياعالم …ده احنا حاربنا وانتصرنا في شهر رمضانه المبارك . ولا مرور فترة ٤٨ عام علي الحرب كانت كافيه لتغيير جينات المصريين !! فأصبح أغلبهم إتكاليين ، غير مباليين بمصالحهم قبل مصالح غيرهم
وبقي العادي أننا من أول يوم في رمضان لا نسمع الا كلمة بعد العيد وكأن العيد علامة فارقه بين النشاط والكسل ! و بين قضاء مصالح الناس ووقفها .
ولكن أحب أوضح لحضراتكم أن المقصود ببعد العيد هو الأسبوع اللي بعد أجازة العيد .. ويمكن كمان يكون الأسبوع اللي بعد اللي بعده .. لأن احنا لسه خارجين من أجازة العيد يا بيه .. وكل سنه بقي وانت طيب !!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *