كيف نتعامل مع الأزمة الإقتصادية

بقلم غادة المنوفي

طبعا الدنيا غالية والأسعار ارتفعت والدخل مش مقضي اية العمل؟
١_الدخل : لازم يكون في تقسيمة مظبوطة للدخل يعني اول ما اقبض ارتب أوضاعي وافنط دخلي اول حاجه الأساسيات يعني إيجار لو في مياة كهرباء واشلهم علي جنب وبعدين أقسم الباقي بردوا يعني الأساسيات في الاكل بردو زى رز بطاطس زيت مكرونة فراخ لحمة ونقسمه علي كياس لبقية الشهر
٢_ اعمل احدد مستوي طلباتي واكتبها في ورقة واكتب جنب كل حاجة ميزانيتها كام

٣_ اعمل علبة صغيرة نسميها أزمات ودي هحط فيها مبلغ صغير من الفلوس او على حسب مقدرتك بعد ما أقسم الأساسيات علشان لو حصل أي ظرف مش متوقع خلال الشهر طيب لو مش معايا خالص فائض اعمل ايه لو عشرة جنية حنحطها ومتستهونيش بيها هتفرق جداا بعدين وهقولك ازاى
٤_التخلي عن الأشياء الإضافية وانا مقدرش احددها أنت نفسك هتعرفي أيه اللي تقدري تستغني عنه في ظل الظروف دى علشان ماتزودش العبء عليكي

٥_ دايما ابحث عن العروض في السوبر ماركت أو في مجالات العروض وشوف المناسب ليا وعمل عليه دايرة واسأل نفسي العرض دة هيفيدني الشهر دة لو ايوا اجيبه وخصوصا لو من الأساسيات لو مش محتاجاه الشهر ده أوعى تجيبه وتقولي للشهر الجاي ليه لأن هيعمل معاكي أزمة في الفلوس في نفس الشهر
يبقي أحدد متطلباتي من الشراء علي قدر احتياجي للشهر نفسه علشان مااقعش في مشكلة تانية من الدخل
٦- الاستغناء إيه ممكن أستغني عنه في الوقت دة في خروجات ممكن اقللها كنا بنخرج نتفسح ٢مرتين في الشهر تبقي مرة واحدة أو مرة كل شهرين
٧_البديل دايما ندور على البديل من الشئ اللي محتاجينه علشان منقفش مربوطين بحاجات معينة
٨_تبادل المنفعة والاستفادة منها يعني عندى عربية بدل مااروح الشغل بها لوحدى أخد معايا ٣او٤ من أصدقاء بمقابل او كل واحد عند عربية يروح بها يوم هنوفر علي بعض
ايه كمان أنا مدرس وجاري دكتور
انا أدى لابنه درس وهو يكشف علينا ببلاش وفي حاجات كتير ممكن نكون تبادل منفعة
٩_ فرصة دخل جديد او فرصة اكتساب مهارات للاستغناء عن متطلبات ترهقني
ودي بحاجات بسيطه ممكن بدل ما اروح للخياط يصلح لي لبس اصلحه بايدى في البيت عندى حذاء مفكوك اجيب غراء واعمله علي ايد عندى شنطة مقطوعة اشوف طريقة علي النت لتصلحتها
١٠_اعادة التدوير للمنتجات اللي استهلكتها
ودى شىء مهم جدا لو اشتريت علبة جبنة أو علبة مربي ماارمهاش ازاى استغلها في حاجة تانية بعد ماتخلص وافر على نفسي شراء منتج إضافي
١١_ ادرب نفسي علي حمل المسؤليه وادارات الازمات واقنع نفسي بأنها أزمة وهتمر وان الله سيعنني عليها بإذن الله

في الاخر في حاجات كثير حابة اقولها ولكن في النهايه
احب اقول ان مش كل أزمة بتمر علينا بتكون شيء سلبي ممكن تكون فيها إيجابيات
ممكن نتعلم مهارات جديدة نكتسب أصدقاء جدد مواقف تعلمنا ممكن كمان تقربنا من حبايبنا واولادنا
وكمان لازم تقعد مع اولادك وتعرفهم ان كل شي في الدنيا قابل للتغير والدنيا دايما بيحصل فيها أزمات ولكن احنا ازاى نعدى الازمة
وتقولهم انا دخلي كذا وبجيب كذا وكذا وتشيلهم مسؤلية معاك مش جهد ولكن فكر ووعي وتعرفهم انه مش عيب لو مش قادر تجبلي حاجة ف الوقت ده وان العيب ان محسيش باللي حواليا