بوابة شموس نيوز

إلكترونية – يومية – مصرية


Warning: sprintf(): Too few arguments in /home/shomos/public_html/wp-content/themes/newsphere/lib/breadcrumb-trail/inc/breadcrumbs.php on line 254

نفسي احكي له

1 min read

الشاعرة ريم صلاح

مش محتاجه أسافر عنده
د انا محتاجه أسافر فيه
أمشي مابين شرايينه وقلبه
علشان أسمع بيقول إيه
وافتح باب الهوى يحكيله
عن إحساس قلبي مخبّيه
جايز يفهم حجم مشاعري
واللي بقالي سنين باعانيه
نفسي أقول له غيابه دقايق
بيموّت قلبي ويحييه
نفسي احكي له حاجات لو فعلا
قلبه فهمها ح يقسى عليه
ويخلّيه ..
يفرش كل مشاعره قُصادي
ويقعد جنبي ما يتحرّكش
يسهر طول الليل على راحتي
حتى ف وقت النوم ما ينمش
عينه كمان حتى ما ترمش
علشان يفضل شايف عيني
بتقول إيه لمّا بتتكلم
وازاي كان الشوق جوّايا
بيخلّي العشاق تتعلّم
وازاي كنت كتير باتألم
وقت ما هوّ ما كان على باله
غايب عنّي وعايش وقته
حتى كمان ولا شاغل باله
عمر الحب ما يبقى جماله
غير بالقرب وراحة البال
قلب الناي لو عاش ف الوِحده
مش ح يغنّي ف يوم موال
ولا ح يكون للبدر جمال
من غير شمس بيعكس نورها
ولا فيش كلمه بتصبح حِكمه
من غير معنى يقول مدلولها
وانا كان قلبي ليالي بطولها
بيخبّي الدمعات عن عيني
والأفكار بتحيّر فيّا
حيره تسيبني وحيره تجيني
د اللي ما بينه حبيبي وبيني
حاجه ما حدّش يوم يفهمها
لو مهدود الكون تبنيه
مش محتاجه أسافر عنده
د انا محتاجه ..
أسافر فيه